Алмазбек Атамбаев 28-июнга чейин кол тийбестигинен ажырашы мүмкүн

Экс-президент Алмазбек Атамбаевди кол тийбестигинен ажыратуу боюнча депутаттык комиссиянын чечими Башкы прокуратурага 20-июнда түшкөн. Бул тууралуу SUPER.KG`ге аталган мекеменин басма сөз кызматынан билдиришти.

Атамбаевдин тушунда соттолуп, камакта отуруп чыккан экс-депутат Нариман Түлеевдин кызы Назгүл Түлеева бүгүн атасы Башкы прокуратурага суракка чакырылганын жазып чыкты. Мекеме "тергөөнүн купуялуулугу үчүн" деп бул маалыматты четке каккан да, тастыктаган да жок.

Айрым маалымат булактары Башкы прокуратура Жогорку Кеңештин чечими боюнча корутундуну бир жуманын ичинде чыгарышы керектигин жазышууда, бирок "Экс-президенттин макамы жөнүндө" мыйзамында бул мөөнөт белгиленген эмес.

"Экс-президенттин макамынан ажыратуу боюнча Жогорку Кеңештин чечими мурунку өлкө башчыга каршы күнөө коюлгандан кийин үч айлык мөөнөттөн кечиктирилбестен, Жогорку Кеңештин 80ден кем эмес депутаттарынын добушу менен кабыл алынышы керек. Эгерде бул мөөнөттө Жогорку Кеңештин чечими кабыл алынбаса, коюлган күнөө четке кагылган болуп эсептелет", - деп айтылат мыйзамда.

Эгер Башкы прокуратура 7 күн ичинде корутундусун чыгарса, 27-28-июнь күндөрүнүн биринде бул документ Жогорку Кеңештин кароосуна түшөт. Андан соң депутаттар добуш берүү аркылуу Атамбаевди кол тийбестиктен ажыратуу же ажыратпоо чечимин чыгарып, 28-июнда жайкы каникулга тарашат.

Буга чейин аталган депутаттык комиссиянын төрагасы Каныбек Иманалиев Кыргыз Республикасынын экс-президентинин макамынан ажыратуу үчүн 8 тосмодон өтүү керектигин айткан.

1. 40тан кем эмес депутаттын экс-президентти кол тийбестиктен ажыратуу боюнча кайрылуусу;
2. Тиешелүү парламенттик комитетте бул кайрылууну кароо жана депутаттык комиссияны түзүү боюнча чечими;
3. Депутаттык комиссиянын экс-президентти айыптоого негиздерди издеп топтоо иши;
4. Жогорку Кеңештин Укук тартиби, кылмыштуулук менен күрөшүү жана коррупцияга каршы аракеттенүү боюнча комитетинде кароо;
5. Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти боюнча комитетинде кароо;
6. Жогорку Кеңеште депутаттык комиссиянын чечимин кароо жана Башкы прокуратурага материалдарды жөнөтүү (40тан кем эмес депутаттын макулдугу керек);
7. Башкы прокуратуранын корутундусу;
8. Жогорку Кеңеште добуш берүү (80ден кем эмес депутаттын макулдугу керек).

Учурда Алмазбек Атамбаевди "экс-президент" макамынан ажыратуу процесси 7-кадамда турат.

Алгач Атамбаевге 9 оор кылмыш боюнча айып тагылган. Кийин алардын саны 6га кыскартылган. Алар:

1. Бийликти узурпациялап, массалык маалымат каражаттарына, депутаттарга, коомдук ишмерлерге кысым жасоо жана миллиондогон сомдук доолорго жыгуу;

2. Кримтөбөл Азиз Батукаевди мыйзамсыз бошотууну уюштуруу;

3. Кой-Таш айылында Атамбаев турак жай салган жер тилкени мыйзамсыз сатып алуу;

4. Акча адалдаган "Ака Петролеум" жана "АКА Инвест" компаниялар менен Атамбаевдин тиешеси болушу мүмкүндүгү;

5. Бишкек Жылуулук электр борборун жаңылоодогу коррупция боюнча;

6. ЖЭБге көмүрдү мыйзамсыз ташып келген компания менен Атамбаевдин байланыштыгы боюнча.