Бүгүн, 27-ноябрда Бишкектеги Свердлов райондук сотунда ЖЭБди жаңылоодогу коррупция боюнча соттук отурум уланууда. Буга чейин иштин материалдарын иликтөө процесси жүргөн. Анын алкагында, иштин бардык 55 тому иликтенип бүткөн. Отурумдун башында судья Инара Гилятзединова мурдагы энергетика министри, бул иште айыпталып жаткан Осмонбек Артыкбаев өз каалоосу менен мамлекетке 100 миллион сом төлөгөнүн айткан.
Отурумда мамлекеттик айыптоочулар белгилегендей, мурдагы өкмөт башчы Жантөрө Сатыбалдиев ЖЭБди модернизациялоодогу келишимден баш тартууга мүмкүнчүлүгү болсо дагы, техникалык негизи жок иш-кагаздарга кол койгон. Жантөрө Сатыбалдиевдин мындай кадамы мурдагы өкмөт башчы Сапар Исаков менен жең ичинен сүйлөшүп алган дегенге негиз болгонун айтышты. Мындан тышкары, Темирлан Бримкуловдун TBEAнын өкүлү болгон Мусажан Макелек менен тыгыз байланыш түзгөндүгү айтылды. Мамлекеттик айыптоочу Бишкек ЖЭБи өлкөнүн мамлекеттик стандарты менен эмес, Кытайдын стандарттары менен курулганын белгиледи.
"Бул мыйзамды бузуу болуп саналат. Ошентип Исаковдун, Сатыбалдиевдин, Калиевдин, Авазовдун, Назаровдун, Бримкуловдун коррупциялык кылмыштуу махинациялары мамлекетке 111 миллион доллар өлчөмүндөгү ири чыгым келтирди. Ал эми мурдагы финансы министри Ольга Лаврова "кызматынан кыянаттык менен пайдалануу" менен коррупциянын ишке ашуусуна көмөк көрсөткөнүн дагы эскерте кетели", - деди мамлекеттик айыптоочу.