Ысык-Көлдө жол кырсыгынан каза болгон 2 адамдын аты-жөнү такталды. Бул тууралуу облустук милициядан билдиришти.
Маалыматка ылайык, жол кырсыгы Балыкчы-Ананьево-Каракол унаа жолунун 51-чакырымында болгон.
"Ак-Суу районунун Кереге-Таш айылынын 37 жаштагы тургуну А.Ш. аттуу жаран КамАЗ үлгүсүндөгү оор жүк ташуучу унаасын күн чыгыштан күн батышты көздөй башкарып бара жатып, карама-каршы келе жаткан Каракол шаарынын 31 жаштагы айдоочунун башкаруусундагы Мерседес-Ман оор жүк ташуучу автоунаасы менен сүзүшкөн. Натыйжада эки унаа белгисиз себептерден улам өрттөнүп кетип, анын кесепетинен КамАЗ унаасынын айдоочусу менен жүргүнчү катары келе жаткан 41 жаштагы К.А. аттуу жаран каза болгон. Ал эми Мерседес-Ман үлгүсүндөгү унаанын айдочусу жана дагы бир жүргүнчү алган жаракаттарынан улам райондук ооруканага жаткырылган", - деп билдиришет басма сөз кызматынан.