Дээрлик бир аптадан бери эстрада ырчысы Курал Чокоевдин чуулуу долбоору коомдун талкуусунан түшпөй келет. Программанын автору гана эмес анын катышуучусу болгон Кайрат Примбердиевге да долбоордун кесепети тийди. Элдин кыжырдануусун жаратып, алтургай министрликтин ырчылардын наамдарын жокко чыгаруусуна чейин жеткен чуулуу долбоор тууралуу кабарларды башынан аягына чейин топтодук.
* Шайлоого бир күн калганда, тагыраагы, 9-январда интернет желесине Курал Чокоевди жемелеп, аны жоопкерчиликке тартыш керек деген пикирлер суудай агылды. Ага ырчынын Ютубдагы каналына шоу-бизнес өкүлдөрүнүн катышуусундагы долбоорду жүктөгөнү себеп болду. Кийинчерээк, Курал мырза чуулуу программасы тууралуу үн катып, долбоорду тартууну улантарын, Маданияттын мыкты кызматкери төш белгисин тапшырып берүү даяр экенин айткан.
* Ошол эле күнү артисттин бул долбоорунун айрым үзүндүлөрүн Маданият, маалымат жана туризм министри Нуржигит Кадырбеков аргасыздан көргөнүн, ырчылар эмнеге мындайга барганын түшүнө албай жатканын айтып, элден кечирим сурады. Министр ырчылар катасын моюнга алып элден кечирим сурабаса наамдарынан ажыратуу каралап жатканын да кошумчалаган. Ошондой эле Маданият, маалымат жана туризм министрлиги тарабынан өткөрүлүүчү мамлекеттик маданий массалык иш-чараларга белгилүү мөөнөткө чейин катыштырбоо сунушталган.
* Көп узабай эле жергиликтүү "Марал" радиосу Курал Чокоев менен, "Кыргыз" радиосу Курал мырза, Кайрат Примбердиев менен иштешүүнү токтотуп, ырларын уктурбай тургандарын билдиришкен. Ага улай эле "Ош Пирим" ТРКсы Курал Чокоевдин ырларына бойкот жарыялай турганын жар салды.
* Аягы суюлбаган сындардан кийин ырчы сөгүнүү өтө аша чаап кеткенин, программадагы каталарын моюнга алды. "Айтылып жаткан сындардын баарын кабыл алабыз. Бул долбоорду тартууну уланта беребиз, токтобойт", - деп видеокайрылуу жасады.
* 10-январда Курал Чокоев айтылып жаткан пикирлердин басымдуу бөлүгү терс болгонун айтып, долбоорду тартууну токтоторун, буга чейин интернет желесине жарыяланган видеолор өчүрүлөрүн билдирди.
* Аталышын айтууга ооз барбай турган программанын алгачкы коногу шоумен Манас Алыкулов, андан кийин ырчылар Кайрат Примбердиев жана Кайрат Кыргыз болгон. Аты аталган өнөр адамдары долбоор тууралуу өздөрүнүн пикирлерин билдиришти.
* Ал арада элдин жемесине кабылган Курал Чокоев "өлкөдөн чыгып кетти" деген кептер ар тараптан айтылып жатты. Артист айтылгандарды четке кагып, башка өлкөгө кетпегенин, Кыргыз өлкөсүнөн чыгып кетүү ниети жок экенин порталыбызга билдирди.
* Жарандык көзөмөл комитети Маданият, маалымат жана туризм министри Нуржигит Кадырбековдун отставкасын талап кылып чыкты. Комитет министрдин ырчыларга карата көрүлө турган чараларын адамдын фундаменталдык укуктары жана эркиндиктерине шек келтирет деп эсептейт.
* Ал эми министр Нуржигит Кадырбеков отставкасын талап кылгандар боюнча: "Комментарийсиз калтырам. Отставкамды талап кылгандар кыла берсин. Биз өзүбүздүн жумушубузду аткара беребиз", - деди.
* 13-январда Маданият, маалымат жана туризм министрлиги коомчулуктун терс реакциясын жараткан чуулгандуу программанын автору Курал Чокоевди Маданияттын мыкты кызматкери төш белгисинен ажыратты. Ал эми чуулгандуу долбоорго конок болгон Кайрат Примбердиевди Эмгек сиңирген артисти наамынан ажыратуу сунушу президенттик аппаратка жөнөтүлгөнү маалымдалды.
* Курал Чокоев жокко чыгарылган төш белги эч кандай мааниге ээ эмес экендигин, аты бар бирок пайдасы жок деп айтып чыкты. Кайрат Примбердиев болсо Эмгек сиңирген артисти наамын министрлик жеке өзүнүн ыйгарым укуктары менен тартып ала албайт дейт. Ырчы коркутуулардан улам аргасыздан видеокайрылуу жасаганын да жашырган жок.
* Наамдары жокко чыгарылгандан кийин ырчыларды наамынан ажыратууну колдогондар да, колдобогондор да болду. Теле алып баруучу Эркин Рыскулбеков тилектештик кылып төш белгисин, ага улай эле ырчы Анжелика дагы Маданияттын мыкты кызматкери наамын кайтарып берерин айтып чыгышты.
* Чуулуу долбоордун форматынан башталган талкуунун уландысы наамдар тууралуу болду. Министрликтин сыйлыктарды алып коюу чарасына жөнөкөй жарандан тартып, аттуу-баштуу инсандар дагы караманча каршы пикирлерин билдирип чыгышты. Ал арада министрликтин жогорудагы көрүп жаткан чарасын колдогондор да болду.
14-январда дал ушул теманын алкагында студиябызга Кыргыз Республикасынын Эл артисти Курмангазы Азыкбаев, алып баруучу Нурзат Токтосунова, КТРКнын мурдагы директору Илим Карыпбеков жана коомдук активист Кубанычбек Баялиев келип, жеке пикирлерин ачыкташты. Пикирлер бир тараптуу болуп калбоосу үчүн Маданият, маалымат жана туризм министрлигинен өкүлдөрдү чакыруу аракетибизден майнап чыккан жок.
