Милиция бөлүмүндө бычакталып каза болгон Бурулай Турдали кызы көзү тирүү болгондо эртең 20 жашка толмок. Ал 1998-жылы 11-августта туулган эле. Бүгүн анын көрүстөнүнө эстелик коюлуп, туугандары, мугалимдери жана классташтары эскеришти.
"Бурулай эч кимге зыяны тийбеген жоош, момун кыз болчу. Сабактарды да эң мыкты деген баага окучу. Анын арабыздан кетиши биз үчүн аябай күтүлбөгөн окуя болду. Дагы деле анын жок экенине ишене албай келебиз", - деп эскерет Бурулайдын классташы.
Атасы Турдали Кожоналиев көзүнө жаш алып "эртең анын туулган күнү. Ошого байланыштуу бүгүн туугандар чогулуп үйгө куран окутуп, коюлган жерине эстелигин коёлу дегенбиз. Арабызда жаркылдап-жайнап жүрсө болмок" деп көзүнө жаш алды.
Мындан сырткары тергөө иштеринин жүрүшүнө токтолуп, күнөөлүүлөр тийиштүү жазасын албай жаткандыгын айтты.
"Тергөө иштери дээрлик соңуна чыгып калды. Акыйкаттык жок. Кызымдын өлүмүнө жол ачып берген милиция кызматкерлерине карата бир гана "шалаакылык" беренеси боюнча айып тагылганы турат. Алардын баары эркиндикте жүрөт. Шалаакылык эмес, алар кылмышка катыштыгы бар адамдар катары дагы берене кошулушу керек эле. Мен тергөөнүн жүрүшүнө нааразымын. Экинчи жолу экспертизага бердим эле, жыйынтыгын мурдагыдай эле, болгону убактыларын, күндөрүн алмаштырып чыгарып беришти. Буга мен ишенбейм", - деди Турдали Кожоналиев.