Бурулайдын өлүмү боюнча милиция кызматкерлеринин соту бир саатка кечигип башталды

Бүгүн, 29-мартта Бишкектин Аламүдүн райондук сотунда милиция бөлүмүндө бычакталып каза болгон Бурулай Турдали кызынын өлүмү боюнча сот бир саатка кечигип башталды.

Сот процесси саат 13:00гө белгиленген. Ал эми кечигүү айыпталып жаткан кызматкерлердин биринин жактоочусу кармалып жаткандыктан улам экени айтылды.

Соттук отурумга эки жактын жактоочулары жана жабырлануучу Турдали Кожоналиев келди.

Судья бүгүн жарыш сөз сүйлөнүп, андан соң чечим чыгаруу маселеси караларын айтты.

Бурулайдын өлүмү боюнча 5 милиция кызматкерине 316-берене "шалаакылык" боюнча иш козголгон. Алар Жайыл РИИБинин нөөмөт бөлүмүнүн ага нөөмөткери И.Иманалиев, Жайыл РИИБинин нөөмөт бөлүмүнүн имарат күзөт тобунун милиционери М.Макеев, Чүй ОИИББи боюнча Жол коопсуздугун камсыз кылуу бөлүмүнүн 5-взводунун кенже тескөөчүлөрү З.Байтереков жана З.Айткожоев, Жайыл РИИБинин тергөөчүсү Э.Кадышев.

Окуянын чоо-жайы:

2018-жылдын 27-май күнү Бишкек шаарында жигит кызды ала качып бара жаткандыгы боюнча милицияга маалымат түшкөн. Көп узабай жигит менен кыз бара жаткан унаа Сосновка айылындагы посттон токтотулуп, Жайыл райондук ички иштер бөлүмүнө жеткирилген.

Милиция бөлүмүндө жигит кызга, андан соң өзүнө бычак сайып, оор абалда экөө тең ооруканага жеткирилген. Кыз алган жаракатынан улам көз жумган. Каза болгон кыз 20 жаштагы Бурулай Турдали кызы, ал эми жигит 29 жаштагы Марс Бөдөшов экендиги анык болгон.

Бурулай Турдали кызы борбор шаардагы медициналык окуу жайлардын биринде окуй тургандыгын жана 2018-жылдын август айында Марс Бөдөшовго эмес, башка жигитке турмушка чыгууга даярданып жатканын жакындары айтып беришкен.

Автор: Айсалкын Качкынбекова
Фото: Айсалкын Качкынбекова