КҮНСОБОЛ: Иса Өмүркулов КСДПдан чыгарылды. Анын эми ошол партиянын Жогорку Кеңештеги фракциясын жетектегени канчалык мыйзамдуу?

31-октябрда КСДП Иса Өмүркуловду "партиянын негизги максатына жана партиянын жобосуна каршы аракет жасаган" деп өз курамынан чыгарды. Ошондой эле аны Жогорку Кеңештеги КСДП фракциясынын лидерлигинен алуу боюнча депутаттарга кат жолдонду. Өмүркулов өзү фракция лидерлигинен кетпей турганын айтты.

Буга байланыштуу SUPER.KG порталы "Иса Өмүркуловдун эми КСДПнын Жогорку Кеңештеги фракциясын жетектегени канчалык мыйзамдуу?" деген собол салды.

ЖУМАБЕКОВ: "Иса Өмүркуловдун фракцияны жетектегени мыйзамдуу"

Жогорку Кеңештин төрагасы Дастанбек Жумабеков "Кыргызстан социал-демократтар партиясынан" чыгарылган Иса Өмүркуловдун парламенттеги фракцияны жетектегени мыйзамдуу деген пикирин айтты.

АЛТЫБАЕВА: “Бишкек ЖЭБинде болгон авариядан кийин партияда тиреш пайда болду”

КСДП фракциясынан депутат Айнуру Алтыбаева бул маселени фракция өз жыйынында карай турганын айтты.

“Иса Өмүркуловдун партиядан чыгарылганы тууралуу маалыматты бүгүн окудум. Мен партиянын органдарында жетекчи, саясий кеңеште мүчө дагы эмесмин. Саясий кеңештин отуруму болдубу же болгон жокпу, так биле албайм. Ар бир партиянын өзүнүн уставы бар. Мен саясий кеңештин мүчөсү болбогондуктан отурум легитимдүү же легитимсиз өткөнүн айта албайм. Маселе фракция жыйынында каралат. Бардыгы мыйзамдын чегинде болушу керек.

Быйылкы Бишкек ЖЭБдеги өндүрүштүк кырсыктан кийин партияда тирешүү пайда болду. Учурда ЖЭБ боюнча тергөө болуп жатат. Ушунун артынан көп маселе бар. Тирешүү бар. Бул маселе дагы фракциянын жыйынында каралат”, - деди Алтыбаева.

БЕКЕШЕВ: “Иса Өмүркуловдун фракцияны жетектегени мыйзамдуубу же мыйзамсызбы, карап чыгуу керек”

КСДП фракциясынан депутат Дастан Бекешев белгилегендей, Өмүркуловдун фракциядан чыгышы чечиле элек.

“Анын фракцияны жетектегени мыйзамдуубу же мыйзамсызбы, карап чыгуу керек. Өмүркуловду фракциядан чыгаруу чечими кабыл алына элек. Чогула элекпиз, маалыматыбыз дагы жок. Ал эми Иса Өмүркуловдун партиядан чыгышы тууралуу кандай пикирде экенибизди дагы ойлонобуз”, - деди Бекешев.

ОРМОНОВ: “Партиянын чечими каралып чыгышы керек”

"Бир Бол" фракциясынан депутат Улугбек Ормонов билдиргендей, Иса Өмүркуловду фракция лидерлигинен алуу чечимин фракция мүчөлөрү кабыл алат.

“Фракциянын мүчөлөрү өздөрүнүн лидерлерин бекитет. Мен азыр Иса Өмүркуловдун берген маалымат жыйынын көрдүм. Ал саясий кеңеш толук чогулбаганын, ким добуш бергени белгисиз экенин айтып жатат. Ошондуктан партиянын чечими дагы каралып чыгышы керек”, - деди Ормонов.

ЗУЛПУКАРОВ: “Биринчи Иса Өмүркуловдун партиядан чыгарылганы мыйзамдуу чечим болдубу, ошону билиш керек”

КСДП фракциясынан депутат Төрөбай Зулпукаровдун пикиринде, бул маселе такталышы зарыл.

“Иса Өмүркуловдун партиядан чыгарылганы мыйзамдуу болдубу ошону билиш керек. Ал жерде саясий кеңештин 37 мүчөсү бар. Алардын канчасы жыйынга катышты, кворум болдубу? Муну тактоо кажет. Фракция саясий кеңештин сунушу канчалык деңгээлде мыйзамдуу экенин тактап чыгып, партиянын чечимин кааласа кабыл алат, каалабаса кабыл албайт”, - деди Зулпукаров.

ИКРАМОВ: “Партиянын чечими фракцияга таасирин тийгизбейт”

Эркин депутат Тазабек Икрамовдун айтымында, депутатты партиядан чыгаруу мыйзамсыз.

“Фракцияга депутат болуп партиянын эң негизги уюткусу келет. Партиянын чечими фракцияга таасирин тийгизбейт. Андыктан фракциядагы депутаттар Иса Өмүркуловдун фракция жетекчилигинен кетишин же кетпешин чечим менен кабыл алынат. Мындайда партиянын чечими роль ойнобойт”, - деди Икрамов.

ТУРУСКУЛОВ: “Иса Өмүркуловду КСДП фракциясынын жетекчилигинен алууну фракция чечет”

“Республика-Ата Журт" фракциясынын лидери Жыргалбек Турускуловдун айтымында, Иса Өмүркуловду фракция жетекчилигинен алууну ошол фракциянын мүчөлөрү чечет.

“Буга чейин деле Кожобек Рыспаевди КСДПдан чыгарышпады беле. Партиядан чыгарууну партиянын саясий кеңеши карап чыгуусу керек, бул ошол көпчүлүк добуш менен чечиле турган маселе. Иса Өмүркуловду КСДП фракциясынын жетекчилигинен алуу үчүн фракциянын отуруму болуп, ошол жерден колдоо тапса жетекчиликтен алынат же калат", - деди Турускулов.

РЫСПАЕВ: “Иса Өмүркуловдун лидер болушун фракция депутаттары добуш менен чечишет”

КСДП фракциясынан депутат Кожобек Рыспаев парламенттин депутаты партиянын чечими менен фракциядан чыгарылышы керек деген талап жок экенин айтты.

“Мени деле партиядан чыгарышты, бирок мен фракцияда калдым. Жогорку Кеңештин регламенти боюнча, мындай кадам - мыйзамдуу. Партия өзүнүн депутаттарын шайлоого алып чыкканда тизме берет. Ошонун негизинде элдин добушуна ээ болуп, парламентке өткөндөн кийин Жогорку Кеңештин өзүнүн регламенти менен иш жүрүшү керек. Партиянын чечими менен фракциядан чыгара турган документ жок, жазылган дагы эмес. Моралдык жактан гана чыгарылат. Иса Өмүркуловду өзү каалабаса да партиядан чыгарып коюшту, эми муну фракция чечиши керек. Өмүркуловдун лидер болушун фракция депутаттары добуш менен чечишет”, - деди Рыспаев.

МАСАЛИЕВ: “Партия Иса Өмүркуловду лидерликтен бошоткула деген чечим берсе дагы, бул маселени фракциянын мүчөлөрү чечет”

Депутат Исхак Масалиев Иса Өмүркуловдун партиядан чыгарылганына туура же туура эмес деп баа бере албай турганын айтты.

“Партия кээ бир мүчөлөрүнүн жүрүшү уставга дал келбесе чара көрүшү мүмкүн. КСДПда кырдаал оңой эмес. Ар кандай тирешүүлөр болуп жатат. Мурунку президент ушул партиянын башчысы катары өзүнүн саясатын жүргүзгөнгө аракет кылууда. Партиянын айрым мүчөлөрүнүн пикири башка болуп жатат. Туруктуу идеологиясы, негиздемеси бар бир дагы партия жок. Бир гана коммунисттер партиясынан бар. Калгандарында идеология жок. Ошондуктан партиянын курамы, жетекчиси алмаша берет. Партия "Иса Өмүркуловду лидерликтен бошоткула" деген чечим берсе дагы, бул маселени фракциянын мүчөлөрү чечет”, - деди Масалиев.

КСДП: "Партиядан чыгарылган Иса Өмүркуловдун фракцияны жетектеп турганы мыйзамсыз"

КСДП партиясынын расмий өкүлү Кундуз Жолдубаеванын пикиринде, учурда парламенттеги КСДП фракциясы менен КСДП партиясынын ортосунда ажырымдык болуп, фракция башкача иш алып барып жаткандай таасир калтырууда.

"Чындыгында, Сапар Исаковду премьер-министрликтен алып түшүү чечими кабыл алынганда эле мындай болору билинген. Иса Өмүркулов фракция лидери катары бир да жолу партиянын лидери менен жолугууга келген эмес, бул дагы түрдүү ойлорго түртөт.

Азыр Иса Өмүркуловдун фракцияны жетектеп турганы мыйзамсыз. Анткени партиянын саясий кеңеши Өмүркуловду партиядан чыгарууну чечкен. Демек, азыр депутаттарга ушул чечим ар бирине жеткирилет жана фракциянын мүчөлөрүнө Иса Өмүркуловду лидерликтен кайтарып алуу боюнча сунуш жөнөтүлөт.

Мындан тышкары Иса Өмүркулов КСДПнын саясий кеңешинин мүчөсү болчу. Бул кеңештин регламентине ылайык, партиядан четтетилген адам автоматтуу түрдө саясий кеңештин мүчөсү болбой калат", - деди Жолдубаева.

Айнура Осмонова (КСДП), Карамат Орозова (КСДП), Мухтарбек Айнакулов (КСДП), Мирлан Жээнчороев ("Республика-Ата Журт") соболго жооп берүүдөн баш тартышты.