Президенттик аппарат Текебаевге ырайым кылуудан баш тартты. Анын себебинин чоо-жайы эмнеде?

Тектеш кабарлар: Текебаев жаза мөөнөтүн өтөөдө жана анын кылмыш ишин кайра кароо таржымалы (164 материал)

Утурумдук Өкмөттүн төрайымы Роза Отунбаеванын экс-депутат Өмүрбек Текебаевге ырайым кылуу өтүнүчүнө баш тартылды.

Президентке караштуу Ырайым кылуу маселелери боюнча комиссиянын жооптуу катчысы Кырккелди Кыдырбаев SUPER.KG порталына билдиргендей, алар бүгүн, 10-январда Роза Отунбаеванын өтүнүчүнө жооп беришти. "Өмүрбек Чиркешовичке ырайым кылуу боюнча материал топтолгон жок. Себеби Өмүрбек Текебаев ырайым кылуу жөнүндө өтүнүч жазуудан баш тартты. Ошондуктан Роза Отунбаеванын өтүнүчүн кароо иштери токтотулду", - дейт ал.

Текебаев 22-декабрда президенттен ырайым сурап кайрылуу ниети жок экенин айткан.

Былтыр 25-декабрда Утурумдук Өкмөттүн төрайымы Роза Отунбаева президент Сооронбай Жээнбековдун дарегине Өмүрбек Текебаевге ырайым кылуу өтүнүчүн жиберген. Бул кайрылуу өтүнүчүн Жогорку Кеңештин 6 фракциясы тең колдогон.

Өмүрбек Текебаев "коррупция" боюнча айыпталып 8 жылга эркинен ажыратылган. Анын камалышына негиз болгон көрсөтмөнүн ээси Леонид Маевскийдин өзү Орусияда олуттуу кылмыш ишине шектелип, камакка алынган.